Մայիսի 17-ին Ռինդի գեղատեսիլ սարերն ու խաղողի այգիները կրկին կհյուրընկալեն վազքի, առողջ ապրելակերպի և սպորտային տուրիզմի սիրահարներին։ Արդեն ավանդական դարձած Vineyard Trail Armenia արահետային վազքի (trail running) մրցաշարը տարվա սպորտային ամենասպասված իրադարձություններից է, որն անցկացվում է հենց մեր գյուղի արահետներով։
Մրցավազքի մեկնարկը կտրվի Ռինդի մերձակայքից՝ «Զորահ» (Zorah Winery) գինեգործարանի հարևանությամբ։ Երթուղին անցնելու է խաղողի այգիների և լեռնային արահետների միջով՝ մասնակիցներին պարգևելով հիասքանչ տեսարաններ:
Միջոցառումը կազմակերպվում է Arm Marathon Foundation-ի և TriClub բազմասպորտային ակումբի կողմից՝ Zorah Wines-ի և Wine Republic-ի հովանավորությամբ:
Մրցաշարը նախատեսված է ինչպես սկսնակ, այնպես էլ պրոֆեսիոնալ վազորդների համար։ Մասնակիցների արդյունքները կչափվեն հատուկ ճշգրիտ ժամանակաչափման համակարգերով։ Հասանելի են հետևյալ մրցատարածությունները.
- 1 կմ մանկական վազք. 7-ից 12 տարեկան երեխաների համար։
- 5 կմ վազք. բաց է բոլոր ցանկացողների համար (13 տարեկան և բարձր)։
- 13.5 կմ վազք (350մ բարձրության հաղթահարումով). 18 տարեկան և բարձր անձանց համար, ովքեր ունեն արահետային վազքի փորձ։
- 21.1 կմ կիսամարաթոն (500մ+ բարձրության հաղթահարումով). 18 տարեկան և բարձր անձանց համար, ովքեր ի վիճակի են տարածությունն անցնել մինչև 4 ժամում։
Մայիսի 17-ի ժամանակացույցը
- 09:00 – 09:15 – Մասնակիցների ժամանումը Ռինդ
- 09:45 – Նախավարժանք
- 10:00 – Մրցավազքի մեկնարկ
- 12:00 – 14:30 – Պիկնիկ ձևաչափով հյուրասիրություն (Pasta party)
- 14:00 – Մրցավազքի պաշտոնական ավարտ
- 15:00 – Միջոցառման փակում և ավտոբուսների մեկնում դեպի Երևան
Vineyard Trail Armenia-ն ոչ միայն սպորտային միջոցառում է, այլև ունի հստակ բարեգործական նպատակ՝ աջակցել մեր համայնքին։ Նախորդ տարիներին մրցաշարից հավաքված միջոցներով աջակցություն է ցուցաբերվել Ռինդի միջնակարգ դպրոցին՝ իրականացնելով շենքի ներքին հարդարման աշխատանքներ։ Կազմակերպիչները վստահեցնում են, որ տեղական նախաձեռնություններին աջակցելու այս բարի ավանդույթը շարունակական է լինելու։
Նման մասշտաբային տոն չի կարող կայանալ առանց կամավորների աջակցության: Եթե սիրում եք սպորտը, պատասխանատու եք և ցանկանում եք օգնել միջոցառման կազմակերպչական հարցերում, կարող եք միանալ որպես կամավոր։ Հենց ձեր մեկ բաժակ ջուրն ու ժամանակին ցուցաբերած օգնությունը կարող են վճռորոշ լինել վազորդների համար։ Բոլոր կամավորները կստանան հավաստագրեր։
Հարցերի և լրացուցիչ տեղեկությունների համար կարող եք կապ հաստատել կազմակերպիչների հետ՝ info@armeniamarathon.org էլ. հասցեով։
Սպասում ենք բոլորիդ՝ միասին վայելելու գարնանային այս գեղեցիկ սպորտային տոնը մեր հարազատ Ռինդում:
