Գինեգործություն

Ռինդը Վայոց Ձորի գինեգործական մշակույթի սիրտն է, մի վայր, որտեղ հողն ու արևը դարեր շարունակ ստեղծում են անկրկնելի համ ու բույր։ Գյուղի գինեգործական պատմությունը հարուստ է և փառահեղ. դեռևս խորհրդային տարիներին Ռինդի գինին վայելում էր մեծ հռչակ՝ լինելով արվեստագետների և քաղաքական գործիչների նախընտրած ըմպելիքը։ Հայտնի է, որ մեծանուն նկարիչ Էդուարդ Իսաբեկյանն ամեն աշուն այցելում էր Ռինդ, որտեղ ուներ գինու իր անվանական կարասը։

Այսօր Ռինդը ոչ միայն հավատարիմ է իր ավանդույթներին, այլև հանդիսանում է ժամանակակից հայկական գինեգործության առաջամարտիկներից մեկը։ Այստեղ գործում են համաշխարհային ճանաչում ունեցող այնպիսի ընկերություններ, ինչպիսիք են Zorah, ARAR, NOA, Meyron, Yacoubian-Hobbs, SAVAR բրենդները, ինչպես նաև տաղանդավոր անհատ գինեգործներ, որոնց արտադրանքը բարձր է գնահատվում թե՛ Հայաստանում, թե՛ արտերկրում։ Այս բաժնում դուք կգտնեք տեղեկատվություն մեր գործարանների, նրանց պատմության, արտադրատեսակների և կոնտակտների մասին։